СМІ: Затрыманы дырэктар Палаца культуры МАЗ

• 6.03.2025, 20:03

Анатоль Чэпікаў пісаў песні для лукашыстаў.

Паводле падазрэння ў карупцыі затрыманы Анатоль Чэпікаў – дырэктар Палаца культуры МАЗ, прадусар, кампазітар і аўтар «гімна УНС». Пра затрыманне паведаміла крыніца «Люстэрка». У самім ДК сказалі, што мужчына «часова не працуе».

Паводле інфармацыі крыніцы «Люстэрка», дырэктара ДК МАЗ затрымалі блізу месяца таму. Прэтэнзіі сілавікоў былі звязаныя з прафесійнай дзейнасцю кіраўніка канцэртнай пляцоўкі – ён стаў падазраваным паводле карупцыйнага артыкула.

На сайце пляцоўкі Анатоль Чэпікаў па-ранейшаму пазначаны як дырэктар. Журналістка «Люстэрка» звярнулася ў арганізацыю пад выглядам справавога партнёра. Калега мужчыны сказала, што цяпер ён часова не працуе.

– Узніклі абставіны, форс-мажор, – коратка растлумачыла яна. Супрацоўніца не змагла ўдакладніць, калі дырэктар вернецца да працы, і параіла звязацца з адным з яго намеснікаў.

Мабільны нумар мужчыны цяпер недаступны. Мяркуючы з вайбер-старонкі, звязанай з нумарам, апошні раз ён з'яўляўся анлайн 12 лютага 2025 года. На асабістую старонку VK ён не заходзіў пасля 11 лютага.

Анатоль Чэпікаў таксама з'яўляецца прадусарам гурта «PROвакацыя». Гэта дуэт Арцёма Саладухі (не сваяк вядомага спевака) і Марка Войтка. У 2017 годзе гурт удзельнічаў у нацыянальным адборы на «Еўравізію», але не перамог. У Instagram калектыў прэзентуе сябе так: «Васьміразовыя лаўрэаты “Песні года Беларусі”, найлепшы поп-гурт РБ паводле версіі RuTV». «PROвакацыя» актыўна ўдзельнічала ў прапагандысцкай акцыі «Марафон адзінства» перад прэзідэнцкімі выбарамі – 2025.

Раней Чэпікаў займаў пасаду гендырэктара радыёстанцыі «Пілот FM» (яе заснавальнік – БРСМ). У Instagram ён называе сябе «заснавальнікам» станцый «Пілот FM» і «Душэўнае Радыё».

Дырэктар ДК МАЗ таксама піша музыку. Больш за 50 песняў ягонага аўтарства ўваходзяць у «Пералік твораў і іншых аб'ектаў, маёмасныя правы ў дачыненні да якіх знаходзяцца ў калектыўным кіраванні НЦІУ». Выконваюць іх акрамя «PROвакацыі» Аляксей Хлястоў, Анатоль Дзянісаў, Аляксандр Саладуха, Жанет, Вікторыя Алешка ды іншыя лаяльныя ўладам беларускія выканаўцы. Некаторыя кампазіцыі Чэпікава выкарыстоўвалі на праўладных мерапрыемствах – напрыклад, гімн акцыі БРСМ «Беларусь памятае» і гімн пятага Усебеларускага народнага сходу «Беларусь».