Прэм'ер Францыі заклікаў еўрапейскіх лідараў супольна замясціць дапамогу ЗША Украіне

• 4.03.2025, 23:56

Франсуа Байру адзначыў, што Еўропе трэба перагледзець прыярытэты.

Прэм'ер-міністр Францыі Франсуа Байру заявіў, што Францыя і Еўропа павінны «аб'яднаць усе магчымыя сродкі, каб максімальна замяніць» амерыканскую ваенную дапамогу Украіне, прыпыненую адміністрацыяй прэзідэнта Дональда Трампа.

Пра гэта ў аўторак, 4 сакавіка, паведамляе Le Monde.

«Пастаўкі амерыканскай дапамогі падыходзяць да канца, паколькі цэлыя цягнікі, якія былі загружаныя для Украіны, былі спыненыя і не змаглі дабрацца да месца прызначэння», – заявіў кіраўнік ураду на Нацыянальным сходзе.

Ён адзначыў, што Украіне патрэбныя боепрыпасы, «пэўная колькасць выведных сістэмаў» і доступ да «сетак і сувязі».

«Гэта прымусіць нас пераасэнсаваць нашу мадэль, нашы прыярытэты і па-іншаму паглядзець на свет, які мы думалі, што ведаем, і які, як мы выявілі, з'яўляецца больш небяспечным, чым мы сабе ўяўлялі, і паходзіць ад тых, каго мы ўважалі за нашых хаўруснікаў», – падкрэсліў Байру.