Ва ўкраінскім небе ўпершыню заўважылі Mirage 2000-5F

• 4.03.2025, 22:22

Відэафакт.

У сетку выклалі відэа, на якім, верагодна, зафіксавалі французскі знішчальнік Mirage 2000-5F ва ўкраінскім небе. Пра гэта са спасылкай на Telegram-канал «Сланечнік» паведамляе Army Recognition.

«Вам падалося, гэта ўсё Міраж», – гаворыцца ў жартаўлівым каментары пад відэа. Адзначаецца, што Mirage 2000 сапраўды мае даволі выразныя рысы, таму яго цяжка зблытаць з іншым самалётам.

Нагадаем, у лютым французскі міністр абароны Себасцьян Лекарню паведаміў, што Украіна атрымала першыя знішчальнікі Mirage 2000-5F.

Дакладную колькасць перададзеных самалётаў не назвалі.

Mirage 2000 з’яўляецца французскім шматмэтавым знішчальнікам чацвёртага пакалення, які распрацавала кампанія Dassault Aviation. Ён знаходзіцца на ўзбраенні з 1984 года.

Варыянт Mirage 2000-5F з’яўляецца мадэрнізаванай версіяй для французскіх паветраных сілаў. Ён можа несці кіраваныя ракеты MICA-EM з актыўнай радыёлакацыйнай галоўкай саманавядзення, дзякуючы якой быў рэалізаваны прынцып «стрэліў і забыўся».