800 мільярдаў еўраў на пераўзбраенне і дапамогу Украіне: сэнсацыйны план ЕЗ
- 4.03.2025, 12:49
(Абноўлена) Брусэль ахвочы дзейнічаць.
Кіраўніца Еўракамісіі Урзуля фон дэр Ляен прадставіла план пераўзбраення Еўропы і дапамогі Украіне. План прадугледжвае мабілізацыю 800 млрд еўраў і ўключае крэдытаванне на 150 млрд для абаронных патрэб. Сродкі будуць скарыстаныя для вырабу сродкаў СПА і мадэрнізацыі абароннай інфраструктуры сярод краін-сябраў Еўразвязу.
Пра гэта паведамляе Sky News.
Еўракамісія абвясціла аб значнай ініцыятыве для ўмацавання абароннага патэнцыялу Еўропы на фоне пагроз, якія стаяць перад кантынентам.
Старшыня ЕК паведаміла, што Еўропа ахвоча інвеставаць у абарону больш як 150 мільярдаў еўраў, якія маюць быць выкарыстаны для вырабу сучасных сродкаў супрацьпаветранай абароны.
Гэты крок з'яўляецца часткай стратэгічнага плана, які фон дэр Ляен апісала як «пераўзбраенне Еўропы».
Адным з асноўных аспектаў гэтага плана з'яўляецца павелічэнне выкарыстання дзяржаўнага фінансавання ў абароннай сфэры, што дасць магчымасць краінам ЕЗ ажыццяўляць маштабныя інвестыцыі ў распрацоўку і выраб новых абаронных тэхналогій.
Да таго ж, ЕЗ плануе стварыць новы механізм крэдытавання на суму 150 мільярдаў еўраў, каб дапамагчы краінам-сябрам Еўразвязу інвеставаць у мадэрнізацыю сваіх войскаў.
Фон дэр Ляен таксама падкрэсліла важнасць выкарыстання магчымасцяў бюджэту Еўрапейскай Уніі для фінансавання абаронных ініцыятыў.
Адна з галоўных задач — забеспячэнне мабілізацыі прыватнага капіталу праз Ашчадна-інвестыцыйны звяз, а таксама праз Еўрапейскі інвестыцыйны банк, што дасць магчымасць залучыць дадатковыя сродкі для развіцця абароннай прамысловасці.
"Гэта момант для Еўропы, і мы павінны яго апраўдаць", - падкрэсліла Урзуля фон дэр Ляен.
Увогуле, гэтыя крокі маюць на мэце мабілізаваць блізу 800 мільярдаў еўраў для стварэння магутнага абароннага патэнцыялу.
Адкуль могуць узяць гэтыя грошы? Пра гэта «Настоящему Времени» расказаў дарадца ў палітыцы ЕЗ Пэтар Танеў.
«Мабыць, гэтыя грошы пойдуць са сродкаў, якія прызначаліся для рэгіянальнага развіцця. Нечым трэба ахвяраваць. І мы ў Брусэлі цяпер чакаем канкрэтныя заклікі да Еўракамісіі, каб Еўракамісія пільна выдала адпаведную прапанову», — расказаў Танеў.
Адным з захадаў фінансавай падтрымкі краін-сябраў ЕЗ можа стаць аслабленне бюджэтных правілаў Еўразвязу, каб дазволіць выключыць вайсковыя выдаткі з жорсткіх дэфіцытных абмежаванняў у кантэксце фіскальнай палітыкі.
Дарадца ў палітыцы ЕЗ падкрэсліў, што "грошы напраўду для гэтага ёсць": "Проста складанае фіскальнае рэгуляванне палітыкі Еўрапейскай Уніі не прадугледжвае павелічэнне ў тых аб'ёмах, у якіх мы маем патрэбу: гэта не 3%, не 4%, а ад 5% або 6% УБП, якія павінны выдавацца на абаронную прамысловасць".
Ёсць і іншыя варыянты фінансавай падтрымкі, дадаў Танеў: цяпер, паводле ягоных слоў, у Брусэлі абмяркоўваецца стварэнне абароннага фонду з удзелам у ліку іншых Вялікай Брытаніі, Канады і Нарвэгіі.
«З тых сродкаў ЕЗ мерыцца выдаць на абаронную прамысловасць, якая будзе выкарыстоўвацца для вайсковай падтрымкі Украіны ў тым ліку. Для абароны Еўрапейскай Уніі ў цэлым і яе вонкавых меж, і асабліва на ўсходнім флангу, і ў мэтах вайсковай падтрымкі Украіны», — удакладніў Танеў.
Матэрыяльна-тэхнічная падтрымка Украіны з боку Еўразвязу — ракеты, дроны, інтэграваныя сістэмы супрацьпаветранай абароны, сістэмы СПА і г.д. — гэта наступны крок пасля стандартызацыі ВПК краін Еўрапейскай Уніі, дадаў палітык.
«У тым ліку абмяркоўваецца, як выкарыстоўваць магчымасць, маштабы рэалізацыі агульнага ВПК Еўрапейскай Уніі для адпраўкі міратворчых сіл ва Украіну. Мы часта гаворым аб неабходнасці міратворчых сіл ва Украіне, што гэта, мабыць, адбудзецца на падставе нейкага мандата. Але, каб гэта было, нам патрэбная вайсковая прамысловасць. У тых маштабах, якія сапраўды могуць закрыць і абараніць паветраную прастору Украіны; на гэты момант Еўразвяз не мае лішкаў. Я мяркую, што гэта мае быць прыярытэт Еўрапейскага Звязу. Бо фактычна ў такім выпадку Еўразвяз будзе абараняць стратэгічна ўсходні фланг як ЕЗ, так і NATO», – падсумаваў Танеў.