У Мазыры беспілотнік атакаваў высакавольтныя лініі ЦЭЦ
- 2.03.2025, 16:16
Ён заляцеў у Беларусь падчас расейскага нападу Украіны.
Як стала вядома «Флагштоку», адключэнне цеплазабеспячэння ў Мазыры 27-28 лютага было звязана з падзеннем беспілотніка. Аб інцыдэнце паведаміў жыхар раёна, знаёмы з абставінамі здарэння.
Уначы 27 лютага з-за падзення дрона была пашкоджаная адна з высакавольтных ліній мясцовай ЦЭЦ (знаходзіцца на поўдзень ад Мазыра каля нафтаперапрацоўчага завода. — Заўв. рэд.). Праз аўтаматычную сістэму абароны, якая некарэктна спрацавала, аварыйна адключыліся і суседнія высакавольтныя лініі, цалкам абясточыўшы ЦЭЦ, паведаміла крыніца.
Паводле ягоных слоў, пасля некалькіх спроб станцыя была перазапушчаная, аднак узнікла новая бяда - пуск цепланосбіта прывёў да гідраўдару ў сістэме трубаправодаў. У выніку ў некалькіх месцах быў пашкоджаны магістральны трубаправод дыяметрам 700 міліметраў.
Тады забеспячэнне 100-тысячнага Мазыра гарачай вадой у неабходным аб'ёме стала немагчымае.
З афіцыйных паведамленняў, для ўхілення аварыі запатрабавалася праца аварыйных брыгад колькасцю 20 чалавек. Для іх каардынацыі быў створаны штаб, работы кантралявалі Мінэнэрга і чыноўнікі Гомельскага аблвыканкама. Зварачныя работы былі закончаныя толькі да 1.10 28 лютага, да раніцы ў спажыўцоў стала аднаўляцца тэмпература батарэй.
Пралёт беспілотніка ў Мазырскім раёне зафіксаваў украінскі маніторынгавы канал "Рында Маніторыт": спецыяліст канала паведаміў "Флагштоку" аб з'яўленні БПЛА ў паветранай прасторы Беларусі недалёка ад Мазыра 27 лютага а 4.01.
У гэты час Украіна (у тым ліку і паўночныя вобласці: Чарнігаўская, Кіеўская, Жытомірская, Вінніцкая) знаходзілася пад масаваным нападам расейскіх беспілотнікаў. У суседняй Жытомірскай вобласці Украіны пагроза нападу БПЛА захоўвалася з 1.45 да 4.52 паводле менскага часу.
Гэты інцыдэнт стаў першым верыфікаваным выпадкам, калі праз БПЛА былі нанесеныя страты энэргетычнай сістэме Беларусі, адзначае “Флагшток”. Улады ўважылі за лепшае схаваць інфармацыю аб прычынах маштабнай аварыі.
Нагадаем, крыніцы выдання раней паведамлялі, што ўночы 27 лютага невядомы лятальны апарат упаў на гаспадарчую пабудову ў Гомельскім раёне і ўзарваўся.