Камітэт АПЕК+ не стаў пашыраць здабычу нафты

• 3.02.2025, 20:06

Раней прэзідэнт ЗША заклікаў картэль знізіць кошты «чорнага золата».

Чальцы міністэрскага маніторынгавага камітэта АПЕК+ пацвердзілі сваю прыхільнасць дамоўленасцям у скарачэнні здабычы нафты, дасягнутым 5 снежня 2024 года. Пра гэта паведамляе прэс-служба альянсу.

У прэс-службе адзначылі, што, на думку чальцоў камітэта, дадатковае добраахвотнае карэктаванне здабычы забяспечыла стабільнасць нафтавага рынку.

«Камітэт вітаў паляпшэнне паказнікаў адпаведнасці патрабаванням у Рэспубліках Казахстан і Ірак», – дадалі ў АПЕК.

Там таксама заявілі, што камітэт прадоўжыць сачыць за выкананнем дасягнутых у снежні дамоўленасцяў. Наступнае ягонае паседжанне адбудзецца 5 красавіка.

Выступаючы на форуме ў Давосе 23 студзеня прэзідэнт ЗША Дональд Трамп заклікаў АПЕК знізіць кошты нафты. Ён заявіў тады, што зніжэнне коштаў можа спрыяць заканчэнню вайны РФ у Украіне.

Абноўленую нафтавую ўгоду заключылі ў канцы 2023 года, першапачаткова яна была прымеркаваная да канца 2024 года. Тады ўдзельнікі АПЕК+ абвясцілі пра дадатковыя добраахвотныя скарачэнні здабычы нафты на першы квартал 2024 года памерам 2,2 млн бар. за дзень.