Трамп: Угода з рэдказемамі – гэта «вялікае абавязальніцтва ЗША», яе падпішуць сёння

• 28.02.2025, 20:04

Паводле ягоных словаў, «угода вельмі справядлівая».

Пагадненне паміж Украінай і ЗША пра рэдказямельныя рэсурсы з'яўляецца вялікім абавязальніцтвам Вашынгтона. Яно будзе падпісанае ўжо сёння, 28 лютага.

Пра гэта прэзідэнт ЗША Дональд Трамп заявіў падчас сустрэчы з прэзідэнтам Украіны Уладзімірам Зяленскім, паведамляе РБК-Украіна са спасылкай на Sky News.

Паводле ягоных словаў, Украіна і ЗША падпішуць «вельмі справядлівую ўгоду».

«Гэта вялікае абавязальніцтва з боку ЗША», – падкрэсліў Трамп.

У сваю чаргу Зяленскі выказаў надзею, што такі дакумент «стане крокам наперад для Украіны».

Таксама, паводле словаў кіраўніка ўкраінскай дзяржавы, ён плануе абмеркаваць з Трампам, што ЗША «гатовыя зрабіць» у кантэксце дапамогі Украіне.