Джэф Безас выправіць у космас першы цалкам жаночы экіпаж

• 27.02.2025, 21:49

Са спявачкай Кэці Пэры і сваёй нявестай.

Амерыканская ракета New Shepard вясной правядзе 11-ы камерцыйны субарбітальны палёт з турыстамі на борце, у склад экіпажу ўвойдуць шэсць жанчынаў, паведамілі ў прэс-службе кампаніі-распрацоўніцы Blue Origin, якая належыць заснавальніку Amazon Джэфу Безасу.

«Гэта першы цалкам жаночы экіпаж з моманту палёту Валянціны Церашковай у 1963 годзе», – гаворыцца ў паведамленні.

Сярод удзельніцаў місіі:

аэракасмічная інжынерка і прадпрымальніца Айша Боу (ЗША/Багамскія астравы);

кінапрадусарка Керыэн Флін (ЗША);

радыёвядоўца CBS News Гэйл Кінг (ЗША);

актывістка Аманда Нгуен (ЗША/В'етнам);

журналістка, прадпрымальніца і нявеста Безаса Ларэн Санчэс (ЗША);

спявачка Кэці Пэры (ЗША).