Высокадакладны ўдар УСУ па варожым пункце «Траебортнае» на Браншчыне паказалі на відэа

• 26.02.2025, 8:41

Удар быў нанесены ўкраінскім знішчальнікам «МіГ-29» з брыгады «Прывід Кіева».

Учора ў Сеціве з'явіліся кадры з Браншчыны, на якіх можна ўбачыць заснежаны пункт пропуску «Траебортнае», а таксама выбухі на яго тэрыторыі, піша «Дыялог.UA».

Суполка «Саняшнік» паведамляе, што ўдар быў нанесены ўкраінскім знішчальнікам «МіГ-29», які ўваходзіць у склад 40-й брыгады «Прывід Кіева».

Крыніца мяркуе, што для нападу на пункт пропуску былі скарыстаны дзве авіябомбы AASM.

Са звестак суполкі, на тэрыторыі «Траебортнага» знаходзіўся як асабовы склад варожага войска, так і сродкі сувязі і сістэмы радыёэлектроннай барацьбы (РЭБ).

Дзякуючы авіябомбам, якія пастаўляюцца Кіеву Захадам, украінская авіяцыя ўсё часцей наносіць удары па камандных пунктах ворага.

Так, 19 лютага авіяцыя УСУ нанесла бомбавы ўдар па варожых войсках на акупаванай тэрыторыі Запарожскай вобласці. А 17 лютага аналагічны ўдар быў нанесены каля вёскі Чумацкае.

У справаздачы Генштаба УСУ паведамлялася, што ў выніку гэтых нападаў былі знішчаныя фартыфікацыйныя збудаванні, пляцоўка для запуску дронаў і месца дыслакацыі жывой сілы супраціўніка.

Яшчэ ў лютым украінская авіяцыя нанесла ўдар у раёне акупаваных Алешак на Херсоншчыне. Тады мэтай атакі стаў падземны тунэль акупантаў, збудаваны прама пад трасай.