Біл Гейтс назваў нечаканы стымул для маладых пакаленняў

• 24.02.2025, 17:32

Перабольшанне рызык можа падштурхнуць да правільных дзеянняў.

Заснавальнік Microsoft Біл Гейтс у інтэрв'ю гендырэктару Stripe Патрыку Колісану з прэзентацыяй сваіх новых мемуараў заявіў, што сучасная моладзь павінна перажываць усяго праз чатыры, але «вельмі страшныя» рэчы. У яго разуменні - гэта кліматычны крызіс, «некантраляваны» штучны інтэлект, біятэрарызм/пандэмія і ядзерная вайна, піша itc.ua.

«Ёсць чатыры ці пяць рэчаў, якія вельмі страшныя, і адзіная, якую я сапраўды разумеў і перажываў праз яе, калі быў маладым - гэта ядзерная вайна», - кажа Гейтс. «Сёння, думаю, да гэтага спісу варта дадаць змену клімату, біятэрарызм/пандэмію і захаванне кантролю над штучным інтэлектам у пэўнай форме».

Таксама Гейтс назваў сацыяльную палярызацыю - узмацненне адрознення ў становішчы сацыяльных груп (напрыклад, імклівы падзел на бедных і багатых) - «патэнцыйнай праблемай».

Насамрэч Біл не ўпершыню выдзяляе гэтыя праблемныя вобласці і часта згадваў іх у сваіх блогах ці каментарах. Што тычыцца ШІ, то мільярдэр, сцвярджае, што грамадства пакутуе ад «недахопу інтэлекту» і штучны мог бы стаць адным са шляхоў развязання гэтай праблемы - выключна пры кантраляваным выкарыстанні.

«У нас не так шмат экспертаў у медыцыне, матэматыцы ці іншых галінах», – адзначае мільярдэр. «У нас ёсць дэфіцыт інтэлекту. ШІ з часам зробіць гэты інтэлект фактычна бясплатным».

Гейтс таксама кажа, што страх можа стаць пэўным стымулам для маладых пакаленняў, бо «перабольшанне рызык» можа падштурхнуць іх да правільных дзеянняў.