BMW збіў сямейную пару з дзіцячым вазком у Менску

• 24.02.2025, 10:34

Здарэнне патрапіла на відэа.

Жорсткае ДТЗ здарылася 23 лютага ў сталіцы. Пра гэта паведамляе УДАІ ГУУС Менгарвыканкама.

Інцыдэнт адбыўся а 18:00 на вуліцы Ясеніна. Кіроўца BMW спыніўся, каб прапусціць пешаходаў, аднак далей усё пайшло не паводле плану.

У нейкі момант аўто сарвалася з месца і збіла сямейную пару з дзіцячым вазком.

Здарэнне патрапіла на відэа. Варта адразу адзначыць, што гэтыя кадры не для слабанервных.

Мужчыну і пяцімесячнае дзіця даставілі ў бальніцу. Як пазней высветлілася, прычына ДТЗ была вельмі банальнай: кіроўца пераблытаў педалі газу і тормазу. На месцы здарэння працавалі супрацоўнікі ДАІ.