Украінскія вайскоўцы ўзялі ў палон акупанта родам з Заходняй Афрыкі

• 23.02.2025, 10:03

Падчас допыту ён расказаў цікавую гісторыю.

Украінскія воіны ўзялі ў палон акупанта родам з Заходняй Афрыкі. Ён разам з яшчэ пяццю захопнікамі спрабаваў штурмаваць пазіцыі абаронцаў на адным з кірункаў, астатнія акупанты падчас бою былі ліквідаваныя.

Падчас допыту палонны расказаў, што яго мабілізавалі ў шэрагі расейскага войска пасля таго, як ён прыехаў вучыцца ў расейскі Саратаў. Відэа з палонным апублікавалі на Facebook-старонцы Зводнай стралковай брыгады Паветраных сілаў Узброеных сілаў Украіны.

Экзатычнае папаўненне абменнага фонду – паланенне выхадца з Заходняй Афрыкі, які прыйшоў на ўкраінскую зямлю, каб забіваць украінцаў – забяспечылі воіны з шэрагаў Зводнай стралковай брыгады і 35-й асобнай брыгады марской пяхоты імя контр-адмірала Міхаіла Астраградскага. Абаронцы адбілі расейскі штурм на ўкраінскія пазіцыі, знішчыўшы пяцярых расейскіх штурмавікоў. Афрыканец, які трапіў у палон, – адзіны акупант з гэтай штурмавой групы, якому ўдалося выжыць.

«Ваеннапалонны расказаў, што родам з Заходняй Афрыкі і што прыехаў вучыцца ў расейскі горад Саратаў, адкуль яго і мабілізавалі ў войска захопнікаў. Украінскія вайскоўцы прапанавалі палоннаму неабходную медыцынскую дапамогу, накармілі і напаілі яго. На знак падзякі афрыканец з расейскага войска падзякаваў байцам за тое, што тыя захавалі яму жыццё. Надалей ваеннапалонным будуць займацца адпаведныя службы», – расказалі ўкраінскія воіны.

Яны таксама паказалі кароткае відэа з палонным захопнікам.