Прэзідэнт Літвы прапанаваў Еўропе план дзеянняў для падтрымкі Украіны

• 19.02.2025, 19:53

Наўседа падкрэсліў, што еўрапейскія дзяржавы «павінны дзейнічаць цяпер, каб умацаваць бяспеку Еўропы».

Літоўскі прэзідэнт Гітанас Наўседа заклікаў еўрапейскія дзяржавы да неадкладных дзеянняў для падтрымкі Украіны і ўмацавання бяспекі кантынента.

Як паведамляе «Еўрапейская праўда», пра гэта ён напісаў у X (Twitter).

Наўседа падкрэсліў, што еўрапейскія дзяржавы «павінны дзейнічаць цяпер, каб падтрымаць Украіну і ўмацаваць бяспеку Еўропы». Ён прапанаваў свой план такіх дзеянняў, сярод якіх:

- Рэальныя гарантыі бяспекі для Украіны - «сяброўства ў NATO павінна заставацца на стале перамоў».

- Расея павінна быць прыцягнутая да адказнасці за вайсковыя злачынствы, а санкцыі павінны заставацца да спынення агрэсіі.

- Неадкладнае фінансаванне ўзбраенняў і 10 млрд еўраў для ўкраінскай абароннай прамысловасці.

- Арышт замарожаных актываў Расеі і ўвядзенне тарыфаў на расейскі/беларускі імпарт.

- Паскоранае ўступленне ў ЕЗ - мэтавая дата да 2030 года.

«Бяспека Украіны з'яўляецца часткай еўрапейскай бяспекі. Давайце дзейнічаць разам», - падсумаваў прэзідэнт Літвы.

Яго допіс з'явіўся на фоне правядзення ў Парыжы ў сераду, 19 лютага, другога саміту анлайн, дзе павінны абмеркаваць Украіну і еўрапейскую бяспеку.