У рухавік самалёта Belavia трапіла птушка

• 17.02.2025, 21:03

Інцыдэнт здарыўся на маршруце Масква – Берасце.

Шэраг рэйсаў авіякампаніі Belavia 17 лютага затрымліваецца на некалькі гадзінаў, паведамілі ў яе прэс-службе.

Прычынай стала тое, што пры заходзе на пасадку ў рухавік аднаго з самалётаў патрапіла птушка. Гаворка ідзе пра рэйс B2-912 Масква – Берасце.

Embraer 175 не атрымаў бачных пашкоджанняў і прызямліўся шчасна. Але ўсё ж у мэтах бяспекі было пастаноўлена замяніць паветраны карабель.

Так, замест яго выпусцілі Boeing 737. Праз гэта давялося карэктаваць расклад.

У выніку рэйсы B2-913 (Берасце – Масква), B2-914 (Масква – Гомель), B2-915 (Гомель – Масква), B2-916 (Масква – Менск) затрымліваюцца больш чым на чатыры гадзіны.

Belavia прынесла пасажырам шчырыя прабачэнні за сітуацыю, якая склалася.