Келаг: Ніхто не будзе навязваць Украіне мірнае пагадненне

• 17.02.2025, 20:12

Пастанову будуць прымаць Зяленскі і народ Украіны.

Спецыяльны прадстаўнік прэзідэнта ЗША ў пытаннях Украіны і Расеі Кіт Келаг заявіў, што ніхто не будзе навязваць прэзідэнту Украіны Уладзіміру Зяленскаму мірнае пагадненне.

Пра гэта паведамляе Sky News.

Выступаючы перад журналістамі ў штаб-кватэры NATO ў Брусэлі, Келаг заявіў, што ніхто не будзе навязваць Зяленскаму мірнае пагадненне, і што гэтае пытанне будзе вызначацца разам з Украінай.

«Ён і народ Украіны прымуць гэтую пастанову», – сказаў Келаг.

Паводле ягоных словаў, ЗША выслухаюць «пункты абмеркавання» ад кожнага. Пры гэтым ён зазначыў, што ягоная праца заключаецца ў стварэнні гарантый бяспекі для Украіны.