У Гватэмале аўтобус упаў з моста

• 10.02.2025, 21:28

Загінулі больш за 50 чалавек.

У Гватэмале раніцай у панядзелак упаў з моста пасажырскі аўтобус. Паводле звестак выратавальных службаў, загінулі не менш як 51 чалавек. Выратаванне тых, хто, магчыма, выжыў, абцяжаранае. Ратавальнікі выкарыстоўваюць спецыяльную тэхніку, каб прабрацца ўнутр аўтобуса.

Мост Пуэнтэ-Беліс з'яўляецца часткай хуткаснай шашы, якая вядзе са сталіцы краіны на ўсход. Ягоная вышыня 20 метраў, пад ім – другарадная дарога і забалочаны яр. Аўтобус упаў у яр дагары коламі.

Прадстаўнік пажарнай службы сталіцы Гватэмалы Карлас Хернандэс паведаміў, што з месца катастрофы ўжо адпраўленыя ў моргі целы 36 мужчынаў і 15 жанчынаў. Прэзідэнт краіны Бернарда Арэвала абвясціў трохдзённую нацыянальную жалобу.