Расейскі бізнэс паскардзіўся на «вымагальніцтва» з боку Кыргызстана

• 1.02.2025, 12:52

Мінус адна «сяброўская краіна».

Расейскія кампаніі нібы сутыкаюцца з супрацьпраўнымі дзеяннямі і вымагальніцтвам у Кыргызстане.

Пра гэта заявіў прэм'ер-міністр РФ Міхаіл Мішусцін на сустрэчы з кіраўніком ураду Кыргызстана Адылбекам Касымаліевым, паведамляе «Коммерсантъ».

Мішусцін расказаў, што кампаніі атрымліваюць «неабгрунтаваныя прэтэнзіі» з боку высокапастаўленых кіргізскіх чыноўнікаў. Самі кампаніі, паводле ягоных словаў, «добрасумленныя» арганізацыі, якія ўваходзяць у лік найбуйнейшых падаткаплацельнікаў.

«Просім, каб кіраўніцтва Кіргізіі спыніла адміністрацыйны ціск на нашы кампаніі і забяспечыла абарону правоў і законных інтарэсаў расейскіх інвестараў», – дадаў прэм'ер-міністр краіны-агрэсаркі.

Ён таксама ўдакладніў, што канкрэтныя факты супрацьпраўных дзеянняў выкладзеныя ў дыпламатычнай ноце, накіраванай расейскім МЗС у амбасаду Кыргызстана.