Мужчына набыў кватэру ў Менску і знайшоў у ёй два трупы

• 28.01.2025, 21:37

Што было далей.

У Дзяржаўным камітэце судовых экспертызаў расказалі пра незвычайны выпадак, які адбыўся ў снежні летась у Менску.

Мужчына звярнуўся ў міліцыю, паведаміўшы, што не можа патрапіць у нядаўна набытую кватэру.

Экс-уладальнікі не адказвалі на званкі, а дзверы былі зачыненыя знутры.

Пасля ўскрыцця замкоў і ўваходу ў кватэру новы ўласнік выявіў два целы – мужчынаў 1986 і 1973 гадоў нараджэння – у стадыі раскладання.

На месца здарэння адразу ж прыбыла следча-аператыўная група, а судмедэксперты знайшлі сляды ін'екцый.

Прычына смерці вызначаная

Пазней праваахоўнікі высветлілі, што былы ўладальнік жылля і ягоны сябар набылі белы крышталічны парашок, так яны пастанавілі адсвяткаваць угоду.

Эксперты вызначылі, што мужчыны памерлі ад вострай інтаксікацыі метадонам у смяротнай канцэнтрацыі.

Ва ўнутраных органах загінулых таксама знойдзеныя фенабарбітал, трамадол, запіклон, прэгабалін, кветыяпін – многія з рэчываў уключаныя ў Рэспубліканскі пералік наркатычных сродкаў.