Найбуйнейшы банк Нідэрландаў спыняе дзейнасць у Расеі

• 28.01.2025, 15:20

ING прадае свой бізнэс у РФ.

ING Groep, найбуйнейшы банк Нідэрландаў у суме актываў, паведаміў аб дасягненні пагаднення аб продажы свайго бізнэсу ў Расеі кампаніі Global Development JSC. Фактычна гэта азначае спыненне ўсёй яго дзейнасці на расейскім рынку.

Пра гэта паведамляе Reuters.

У адпаведнасці з пагадненнем, расейская фірма, якая належыць маскоўскаму фінансаваму інвестару, выкупіць усе акцыі АТ «ІНГ Банк (Еўразія)» з намерам абслугоўваць кліентаў у краіне пад новым брэндам.

Фінансавыя ўмовы продажу не раскрываюцца.

Чакаецца, што ўгода мецьме адмоўны ўплыў на вынікі ING пасля выплаты падаткаў у суме блізу 0,7 млрд еўра.

Чакаецца, што продаж актываў, пры ўмове атрымання адабрэння рэгулюючых органаў, будзе скончаны ў трэцім квартале 2025 года. Між тым, група плануе працягнуць скарачэнне сваёй афшорнай прысутнасці ў дачыненні да расейскіх кліентаў.

На канец верасня сума рызыкі склала 1 млрд еўраў.

ING заявіў, што пасля ўварвання Расеі ва Украіну ён не вёў новых дзелавых дачыненняў з расейскімі кампаніямі, скараціў маштабы аперацый у краіне і пачаў аддзяляць бізнэс ад сваёй найбуйнейшай сеткі і сістэмы, скараціўшы агульны аб'ём крэдытавання расейскіх кліентаў больш чым на 75%.

Раней Bloomberg паведамляла, што еўрапейскія банкі, якія засталіся ў Расеі, патроілі прыбытак з пачатку вайны. Буйныя еўрапейскія банкі працягваюць кіраваць усё больш прыбытковымі падраздзяленнямі ў краіне, нягледзячы на публічныя абяцанні закрыць іх.

Прыбытак даччынай кампаніі аўстрыйскага Raiffeisen Bank International за гэты перыяд вырас больш чым утрая, а ў Intesa – прыкладна ў 20 разоў.

Паводле звестак агенцтва, сукупная колькасць супрацоўнікаў пяці банкаў Еўрапейскага Звязу з найбуйнейшымі аперацыямі ў Расеі абрынулася ўсяго на 3% пасля ўварвання.